عزيز حامد مدني

عزيز حامد مدني: مشهور اديب، شاعر، نقاد، ترجمي نگار ۽ براڊڪاسٽر عزيز حامد مدني، 15 جون 1922ع تي راءِ پور (انڊيا) ۾ ڄائو. شروعاتي تعليم راءِ پور، الهه آباد، علي ڳڙهه ۽ ناگپور جي مختلف تعليمي ادارن مان حاصل ڪيائين. هن 1934ع ۾ ميٽرڪ پاس ڪئي. 1943ع ۾ گريجوئيشن ۽ 1947ع ۾ انگريزي ادب ۾ ايم. اي جي ڊگري حاصل ڪيائين. ورهاڱي بعد خاندان سميت پاڪستان لڏي آيو ۽ ڪراچيءَ ۾ رهائش پذير ٿيو. عملي زندگيءَ جي شروعات تعليم کاتي ۾ استاد جي حيثيت سان ڪيائين. ڪراچيءَ ۾ ايس. ايم. ڪاليج ۾ انگريزيءَ جو ليڪچرار مقرر ٿيو. ڪجهه عرصي بعد پبلڪ سروس ڪميشن جو امتحان پاس ڪري 1950ع ۾ ريڊيو پاڪستان سان منسلڪ ٿيو. ريڊيو جي نوڪريءَ دوران ملڪ جي مختلف شهرن ۾ رهيو. 1973ع ۾ آمريڪا ويو، جتي فيڪلٽي آف ڪميونيڪيشن سيراڪيوز يونيورسٽي آف نيويارڪ ۾ پاڪستان جي نمائندي جي حيثيت ۾ شرڪت ڪيائين. 1982ع ۾ ڪنٽرولر آف هوم سروس جي عهدي تان رٽائر ٿيو. سندس لکيل شعري مجموعن ۾ ‘چشم نگران’ (1960ع)، ‘دشت امڪان’ (1962ع) ۽ ‘نخل گمان’ جي نالن سان ڇپيل آهن. ان کان سواءِ سندس ٻين تصنيفن ۾ شيڪسپيئر جا ٻه ڊراما ‘انٿوني’ ۽ ’قلوپطرا’ کي اردو ٻوليءَ ۾ ترجمو ڪرڻ کان سواءِ هڪ تنقيدي ڪتاب ‘جديد اردو شاعري’ پڻ شايع ٿيل آهي. هن 23 اپريل 1991ع تي وفات ڪئي. کيس ڪراچيءَ ۾ پراڻي لياقت آباد جي قبرستان ۾ دفن ڪيو ويو.

داخلا ۾ استعمال ٿيل تاريخون

1922.06.15  عيسوي

مشهور اديب، شاعر، نقاد، ترجمي نگار ۽ براڊڪاسٽر عزيز حامد مدني، 15 جون 1922ع تي راءِ پور (انڊيا) ۾ ڄائو.

1991.04.23  عيسوي

عزيز حامد مدني 23 اپريل 1991ع تي وفات ڪئي. کيس ڪراچيءَ ۾ پراڻي لياقت آباد جي قبرستان ۾ دفن ڪيو ويو.

اديب - ڀاڱي جون ٻِيون داخلائون